8o
Улаанбаатар хот
mobile menu

Цагдаагийн байгууллагаас сэрэмжлүүлж байна

2016-02-12 11:26:00

Сар шинийн баяртай холбогдуулан Цагдаагийн ерөнхий газраас иргэдэд дараахь зөвлөмж, сэрэмжлүүлгийг хүргэж байна. Баярын өдрүүдэд архи, согтууруулах ундааны худалдаа, борлуулалт нэмэгдэж байгаатай холбогдуулан эрүүл ахуйн шаардлага хангаагүй, стандартын бус, хямд үнэтэй бүтээгдэхүүн үйлдвэрлэж борлуулах, худалдаалах хэрэг, зөрчлөөс урьдчилан сэргийлэхэд цагдаагийн байгууллага анхааран ажиллана.

-Иргэд, аж ахуйн нэгж, байгууллагууд архи, согтууруулах ундаа, хүнсний бүтээгдэхүүн худалдан авахдаа баталгаатай, эрүүл ахуйн шаардлага хангаж байгаа тухай дүгнэлт, шинжилгээний бичгийг үзэж худалдан авах.

-Хуурамч, баталгаагүй хямд архийг хүн ам олноор төвлөрсөн захад /Нарантуул, Хархорин, Баянзүрх гэх мэт/ зарлал мэдээллийг нууцаар тарааж, нийслэл хотын захын дүүрэгт байрлах агуулах, сав, контейнерээс шөнө оройн цагаар их хэмжээгээр ачиж хөдөө, орон нутагт аваачин зарж борлуулах хэрэг гарч байсныг анхаарах хэрэгтэй.

-Сар шинийн баяр ойртоход орон байр, халаасны хулгайн гэмт хэрэг гарах нь нэмэгдэх хандлагатай байдгийг анхаарч өмч, хөрөнгөндөө тавих хяналтаа сайжруулж, ялангуяа хөдөө орон нутгийн иргэд нийслэлийн томоохон худалдааны зах, дэлгүүрээр явахдаа халаасны хулгайн болон залилан мэхлэх гэмт хэргээс урьдчилан сэргийлэхэд анхаарах.

-Мал хулгайлах гэмт хэрэг хөдөө орон нутагт өсөх төлөвтэй байгааг анхаарч малыг байнгын хариулга, маллагаатай байлгах,

-Нийслэлээс болон орон нутгаас гарч явахдаа тээврийн хэрэгслийн бүрэн бүтэн байдлыг хангаж, хурдыг тохируулж, аюулгүй байдлаа хангах

-Галын аюулаас урьдчилан сэргийлэхэд цахилгааны шугам, хэрэгслийн бүрэн бүтэн байдлыг ханган, гал алдахаас сэргийлэхийг зөвлөж, сэрэмжлүүлж байна.

Хэрэв дээрх хэрэг зөрчил гарвал мэдээллийг Нийслэлийн цагдаагийн шуурхай утас 102 дугаарт хандана уу.

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.chuhal.mn хариуцлага хүлээхгүй.
Нийт сэтгэгдэл
  • Recent
  • Most Read
  • Most Comment